Bygningsarbeidarar streikar mot bemanningsbransjen

Torsdag klokka 14.00 utanfor Stortinget, blir det streikemarkering med politiske appellar og kulturelle innslag.

Bak den politiske streiken står LO i Oslo, Heismontørenes Fagforening og Elektromontørenes Forening i EL og IT Forbundet, Tømrer og Byggfagforeningen og Bygningsarbeidernes Fagforening i Fellesforbundet.

Les også: Tilsyn fann storstilt ulovleg innleige. Klubben håpar bedrifta endeleg skjerpar seg

Forby bemanningsbransjen

Kravet er forbod mot innleige frå bemanningsbyrå, og som strakstiltak forbod på byggeplassar i Oslo, Viken og Vestfold.

– Bemanningsbransjen og låglønnskonkurranse har bite seg fast og blitt ein fast del av arbeidslivet. Vi har prøvd å regulere bransjen gjennom likebehandling og innstrammingar i innleigereglane, men ikkje lykkast, seier leiar Joachim Espe i Bygningsarbeidernes Fagforening i Oslo.

Fagforeiningane meiner det går på kostnad av faste tilsettingar, stillingsvern og kontroll på arbeidstida – og fagmiljøet:

– Bedriftene er ikkje interessert i å investere i kompetansen til mellombels arbeidskraft, påpeikar leiar Alexander Hopland-Wøien i Tømrer og Byggfagforeningen i hovudstaden.

Adecco søker etter tømrere til 50 timers uke: Ulovlig og oppsiktsvekkende, sier LO-jurist

Innstrammingar ikkje bra nok

Leiarane i byggforeiningane i Oslo viser til at massiv innleige, og dessutan større bruk av underentreprisar, har halde fram i byggebransjen etter at innleigereglane vart stramma inn i 2019.

Heller ikkje makta Arbeidstilsynet fekk i fjor sommar til å kontrollere reglane og gi pålegg, har fått bukt med ulovleg innleige.

– Det har vore mykje omgåing av reglane og bruk av smotthol, både i produksjonsbedriftene og bemanningsbyråa, hevdar Espe.

Torsdag lanserer fagforeiningane ein rapport om innleiga i byggebransjen i Oslo, som skal vise at lovendringar ikkje har hatt effekt på bruken av innleige.

Les også: Adrian vant mot arbeidsgiver i retten. Så ble han permittert og har ikke fått erstatningen han har krav på

Halde partia ansvarleg

Det er ikkje tilfeldig at streiken skjer dryge to veker før stortingsvalet, der maktforholdet i norsk politikk kan vippe i favør dei politiske partia på venstresida.

– Vi ønsker å halde partia ansvarleg, også når dei er i posisjon. Dette er eit signal til dei, seier Hopland-Wøien og viser til eit eventuelt regjeringsskifte etter 13. september.

Også i 2017, 2018 og 2019 gjennomførte fagforeiningane politiske streikar mot bemanningsbransjen.

– Dette er fjerde gong vi streikar, noko som viser at dette er eit krav vi ikkje kjem til å sleppe. Det handlar om kampkrafta til fagrørsla, så om vi ikkje står på kravet kan vi like godt pakke saman, avsluttar Espe.

Les også: Halvparten av innleien hos Statsbygg var ulovlig