Flere saker
Dette er en sak fra
Magasinet for fagorgansierte
Vi skriver om ansatte i store bransjer i privat sektor, blant annet industri, bygg, transport og hotell og restaurant.
Les mer fra oss
Framtida for offentleg transport?
Her kjem bussen når passasjerane vil
I Solund kan passasjerane tinge buss, så han kjem til avtalt tid. Dei får ikkje berre transport og hjelp med bagasjen, dei får òg ein god prat.
Annonse
SOLUND: – Eg likar å kalle han ein samfunnsbuss eller ein trivselsbuss.
Det seier bussjåfør Helge Viggo Engdal.
Me står på kaia i Krakhella i Solund, ytst i vêrharde Sognefjorden. Herfrå skal han køyre rutebuss med passasjerar som stig av hurtigbåten frå Bergen, og dagfersk bakst som skal leverast til nærbutikken på kommunesenteret.
Annonse
Bestillingsbuss
Tidlegare på dagen har han vore på bestillingskøyring, ein slags buss som fungerer som drosje og som innbyggjarane nyt godt av. Bestillingsbussen er ekstra praktisk for folk som ikkje køyrer bil, og han har òg ein trivselseffekt.
– Me køyrer folk, pakkar til private og bedrifter og medisinar til sjukeheimen, eigentleg det meste. Men me slår òg av ein prat og kan hjelpe til med å stable varer og pakkar inn i bussen. Å hjelpe kvarandre er alfa og omega om ein skal klare seg her ute, seier Engdal.
Annonse
Han har vore bussjåfør i heimkommunen i 27 år, og har «verdas beste kontorutsikt» over det vakre, men karrige landskapet. På smale vegar helsar han på kvar einaste møtande bil. Engdal har vore med på mange endringar i både busstilbod og arbeidsvilkår. Særleg éi av dei er av det positive slaget.
– Kvar torsdag kan folk tinge skyss med bussen. Me hentar og bringar, slik at dei til dømes kjem seg på handletur eller til dagsenteret på eldresenteret, forklarer Engdal.
Annonse
– Heilt ypparleg
For å tinge bussen nyttar ein Skyss-appen, eller ein ringjer. Ein god del av passasjerane er av den eldre garde og likar telefon best.
Mellom dei er Venche Ferøy. Ho bur på Færøyna og tek fyrst skyssbåt over til hovudøya Sula. Frå ferjekaia der tek ho bestillingsbuss til Hardbakke, kommunesenteret. Der handlar ho, hentar pakkar og tek seg ein kaffi og ein god drøs med kjentfolk. Det er små forhold, så kjentfolk er det mange av.
– Eg er ein flittig brukar av det tilbodet. Det er heilt ypparleg, seier Ferøy.
Ho kan ikkje rose sjåførane nok. Dei er rett og slett fantastiske, tykkjer ho. Og utan bussen ville det kjapt blitt nokre tusenlappar i drosjeutgifter kvar månad. Servicebilletten kostar 60 kroner tur-retur.
Sjåfør Helge Viggo Engdal stadfestar at kjærleiken er tosidig. På ein liten plass som Solund blir ein glad i passasjerane.
– Det er den store fordelen med å jobbe på ein slik plass. Det hender me får både blomar og sjokolade av folk som er glade for jobben me gjer.