No skal Nav krevje dagpenge-forskotet tilbake frå ledige og permitterte

Det skriv etaten på nettsidene sine.

Frå april til juni har Nav utbetalt til saman 3.840 millionar kroner i forskot på dagpengar til 180.000 personar som venta på behandling av dagpenge-søknaden sin.

Nav fekk kraftig kritikk då dei begynte å trekke forskot frå dagpengar samtidig som permitterte mangla ei utbetaling frå Nav på nesten ei heil månadslønn, den såkalla lønnskompensasjonen.

Fekk du med deg denne? Korona-lønn frå Nav: No kan du søke sjølv

Dei stansa derfor trekka og betalte tilbake.

Etter forseinkingar var lønnskompensasjonen for permitterte på plass i juni. Dermed skal Nav no krevje dagpenge-forskotet tilbake.

Slik krev dei pengane tilbake

Dersom du har fått utbetalt lønnskompensasjon og får dagpengar, blir 20 prosent av kvar dagpenge-utbetaling trekt frå til nedbetaling av forskotet.

Får du ikkje lenger dagpengar? Då kjem Nav til å sende deg ein faktura i andre halvdel av august. Deretter kan du velje om du vil betale tilbake heile beløpet eller dele opp i fleire betalingar. Det same gjeld dersom du har fått avslag på dagpenge-søknaden din.

Dersom du framleis ventar på behandlinga av dagpenge-søknaden din, kjem Nav til å trekke heile forskotet frå etterbetalinga av dagpengar.

Nav kjem ikkje til å trekke forskotet frå dagpengane dersom du ikkje har fått lønnskompensasjon.

Les også: Kantinetilsette fekk altfor lite i korona-lønn: – Eg trur ikkje alle sjekkar dette

Ein kan også betale tilbake forskot sjølv. Du finn beløpet på brukarsidene på nav.no og kan betale tilbake heile eller delar av beløpet.